歐陽永權－《講古．港故》
漫談麻雀和香港人的二三事(二)

 
當時社會上有個爭論係，政府禁賭，但係打麻雀究竟算係賭博定自娛，大家都議論紛紛。為左平息爭論，同埋方便管理，因為咁多人打牌，政府想禁都難度甚高，於是索性發牌。
當時係1956年，林伯個仔林祺先生代表業界同政府傾。
 
由於當時禁賭，政府為左面子同照顧道德能既要求，於是走法律「喇」，發牌個時叫mahjong school，即係麻雀學校。即係話市民打牌係進修麻雀技術姐，咁輸錢囉，咪要交學費囉。而發出既牌照有144張，因為一副麻雀有144隻牌咁囉。
 
所以，無論麻雀館中文叫麻雀娛樂定麻雀公司定咩都好啦，英文都係叫mahjong school。
係「竹館」打麻雀通常有主要規定： 只算「雞糊」及「一番」。因此各位雀友皆以儘快食糊為目的。麻雀館收入靠抽水，由食糊個位俾水。當然啦，唔通輸錢個個俾咩。食一次糊，其他三家都要賠錢，打牌時不能隨便拆搭，否則有人糊出要包賠。做莊個陣仲可以收雙倍，梗係食糊個個俾水就做公道啦。
 
而且竹館抽水真係天經地義，除左維修麻雀同檯檯凳凳，又要隨住時代進步同顧客要求，不斷裝修，以求環境舒適，等大家打得開心，又要提供生果同茶水等服務，招呼又要周到，又到請睇場維持秩序同防止有人出千，咁既服務，當然抵俾人抽水喇。麻雀館中級職員叫做「水袋」，身懷巨款，揹着布袋四圍巡，有客人「食糊」即上前「抽水」。（待續）