歐陽永權-《講古.港故》
漫談麻雀和香港人的二三事(一)

一講起廣東人同香港人既娛樂消遣,進攻四方城、打麻雀一定會係大家腦海裡面浮現。

而第一間麻雀館,係八十幾年前已經出現,由人稱生果皇既林賢昆先生,林伯創立。

做過雞欄同賣生果既林伯,中左百幾蚊馬標之後,係廟街開士多,賣小食糖水。

由於士多位置方便,好多街坊一得閒就去個度吹水聚腳,甚至打麻雀。當時既牌用竹做,成本唔平架,咁成日打,梗係會有破損啦。街坊為左表示心意,時不時都會放低D錢落士多既錢箱。

林伯初初雖然唔肯收街坊錢,只任由街坊隨意捐獻,後來落來打牌既人越來越多,林伯發現有利可圖,索性出租麻雀檯俾人打牌,一毫子就可以打一日。

講真,用竹做既麻雀的確唔平,加上又要管理,係屋企打又嘈住人,無論係成本角度,定係環境因素,都係租檯打麻雀最化算,所以一毫子一日,算好抵架喇。而且一邊打牌,一邊可以同唔同街坊聯誼,又可以識新朋友仔,直頭抵到爛啦。

咁抵玩,梗係大把人去打牌架,於是林伯生意好到,索性連士多都唔做,改做麻雀舖算數,因為仲好賺。而呢間麻雀舖,就係香港第一間麻雀舖雞記喇。

咁旺場,唔單單因為位置方便,仲因為林伯服務無微不至。你知啦,打牌實有贏輸。爭拗難免。林伯為左減少紛爭,等大家打得放心,發明左一套公平既上牌碰牌規則,令到大家打得開心又放心,所以好多人都鐘意去雞記打牌。而呢套法則,到依家都仲用緊架。(待續)

歐陽永權
資深傳媒人,網絡電視創辦人。因想為香港文化出一分力,毅然大手投資開辦網絡電視台—香港製造(MIHK.tv)。MIHK.tv現為香港最大網絡電視台,一共八條頻道,超過五十個自家製節目;所有節目保證最貼地最本土,讓香港人有多一個選擇。
No Comments Yet

Leave a Reply

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>